சொந்தமா ஒரு இசைவிழா !

மே மாசத்தை  ம்யூஸிக் மாசமா அறிவிச்சுருந்தது  நியூஸி அரசு.  அங்கங்கே 'பாட்டுக் கச்சேரிகள் '  நடந்ததுன்னாலும்  இந்த கோவிட் காரணம் பெருசா ஒன்னும் பேசப்படலை. நம்மூரில் ரேவதி  பெர்ஃபார்மிங் ஆர்ட்ஸ் ஒரு சின்ன நிகழ்ச்சிக்கு ஏற்பாடு செஞ்சு நமக்கு அழைப்பு அனுப்பினாங்க.  தோழியின்  கலைப்பள்ளிதான் இது. பரதநாட்டியம் & பாட்டு சொல்லித் தர்றாங்க. வீக் எண்டுகளில் வகுப்பு !    

கச்சேரி நடக்கும் ஹால், நம்மூர் கிளை நூலகம் ஒன்றில். நிலநடுக்கத்திற்குப் பிறகு கட்டுன  புதிய கட்டடங்களில் ஒன்னு !   இங்கே சின்னதும் பெரியதுமா ரெண்டு ஹால்கள்  உண்டு. வாடகைக்கு எடுக்கலாம்.  கம்யூனிட்டிக்கான நிகழ்ச்சிகளுக்கு வாடகை குறைவாகவும், தனியாரின் நிகழ்வுகளுக்கு வாடகை அதிகமாகவும் நம்ம சிட்டிக் கவுன்ஸில் வசூலிக்குது.மகளின் கல்யாண வரவேற்பு இங்கேதான் நடத்தினோம்..

உள்ளே போனவுடன் கண்ணில் பட்டவை தப்லாக்களும் சிதாரும் ! ஹா.....

இங்கே யார் சிதார் வாசிக்கப்போறாங்கன்னு ....... 

நம்ம நண்பர் ஜோஷுவா தேவன்பு ( பெங்களூர்க்காரர்)  தப்லா வாசிப்பார். இவரும்   தப்லா சொல்லித்தரும் வகுப்பு நடத்தறார். எல்லாம் வீக் எண்டுகளில்தான்.  கற்றுக்கொள்ள ஆர்வம் இருந்தால் எந்தக் கலையையும் கைவசப்படுத்தலாம்தானே! 

அப்புறம் மூவர் வந்தாங்க. Nelson Myers-Daly , நம்ம  பண்டிட் சௌராஸியா (Pandit Hariprasad Chaurasia )வின் இசையில் மயங்கி அவரையே மானஸிக குருவாக  பூஜித்து, குழலிசைக் கற்றவர்.     சின்மயானந்தா மிஷனின்  அங்கம். Monk Party என்ற இசைக்குழுவை நடத்தறார். உலகெங்கும் உள்ள சின்மயானந்தா மிஷனின்  சபைகளில்  இவருடைய கச்சேரிகள் நடந்துருக்கு ! குழல் மட்டுமில்லாமல்  தப்லாவும், மற்ற இசைக்கருவிகளும் கூட வாசிப்பாராம்.   

Liam Oliver சிதாரும் சாரங்கியும் வாசிச்சார்.  

தப்லா வாசிச்சவர் பெயர்தான் நினைவில் இல்லை.  (அப்ப மத்த ரெண்டு பெயர் எப்படின்னு கேக்கமாட்டீங்கதானே ? இவுங்க நம்ம ஃபேஸ்புக் ஃப்ரெண்ட்ஸ் என்பதை சொல்லிக்கொண்டு.....)  வேறொரு பதிவில் இவர் பெயரைத் தோழியிடம் கேட்கப்போய் இன்னொரு தோழி உடனே பதில் அனுப்பிவிட்டார். தப்லா வாசிச்சவர் பெயர் Louis Talbot . 

சிதார், சாரங்கி, தப்லா, பாஸூரின்னு அமர்க்களம் போங்க !   நம்மூரில்தான்  இவுங்க இருக்காங்கன்றதே இப்பதான் தெரிஞ்சது. 

அநேகமா கீழே சேர்த்த ஃபேஸ்புக் பதிவின் லிங்கை Copy & Paste பண்ணினால் பார்க்கலாமுன்னு நினைக்கிறேன்.

ஒன்னேகால் மணி நேர நிகழ்ச்சி  என்பதால் நேரம் போனதே தெரியலை!