கேசவனும், க்ருஷும் பின்னே வெங்கியும் கூடாதே... அம்மையும்! ( மூன்று மாநிலப் பயணம்- தொடர் : 49)

 காலையில்  அஞ்சே காலுக்கு எழுந்து குளிச்சு முடிச்சு கேமெராவுடன் கோவிலுக்குக் கிளம்பிட்டோம். நடந்துதான்.  சூரியன் இன்னும் வரலை.  குளுமையான  காலநிலை.  நடப்பது ஒரு சுகமாத்தான் இருந்துச்சு.  இது கிழக்கு நடை வீதி. நாலைஞ்சு   ஹொட்டேல்கள் இருக்கு இங்கேயே!

 வாகனப்போக்குவரத்து ஒன்னும் இல்லை என்பதால் ஆசுவாசமாக இருந்துச்சு. குருவாயூர் முனிசிபல் ஆஃபீஸ் கூட   இங்கேதான் இருக்கு. அதைத் தாண்டினதும்  சிறகு விரித்த ப்ரமாண்டமான கருடன்.  இருள் பிரியா நேரமானதால்  படம் சரியா வரலை. நிலவிளக்கு ஏத்தி வச்சுருக்காங்க.

கடைகளில்   அன்றைய வியாபாரம் தொடங்கி நடந்துக்கிட்டு இருக்கு.  கோவில் இரவு மூணு மணிக்கே  திறந்துடறாங்கதானே!  நிர்மால்ய பூஜைக்கு வர்றவங்க அத முடிச்சுக்கிட்டுத் திரும்பும்போது  கடைகளை எட்டிப் பார்க்கும் வழக்கம் இருக்குல்லே:-)

கொட்டகைக்குள்  சின்ன சந்நிதிகள் போல  மூணு மண்டபங்கள்  இருக்கு.  அதுலே நிலவிளக்கு ஏற்றி வச்சுருக்காங்க.  கடந்து போனால் கோவில் முகப்பில்   நேத்து இரவு பார்த்ததுபோலவே பெட்டிக்குமுன் வரிசையில் ஆட்கள். நமக்குத்தான் இப்ப உள்ளே போக வழி தெரிஞ்சு போச்சே!  கோவிலுக்கு இடப்பக்கம்  உள்ள வாசலுக்குப் போனோம். போகும் வழியிலேயே க்ளோக் ரூமுக்கு எதிரே கோவிலுக்குள் போய் தரிசிக்கும் வரிசை ஆரம்பிக்குது. எட்டிப் பார்த்தால்  ஒரு பத்துப்பதினைஞ்சு பேர்தான்.  ஆசை யாரை விட்டது?




க்ளோக் ரூம் கவுண்ட்டரில்  கெமெராவையும் செல்ஃபோனையும்  ஒப்படைச்சுட்டுப்போய் கம்பித்தடுப்பு வரிசையில் சேர்ந்துக்கிட்டோம். மணி இப்போ ஆறேகால்தான்.  சாமி தரிசனம் முடிச்சுட்டே  போகலாம்.  ஒரு அரைமணி காத்திருந்தோம். நம்ம வரிசைக்கு வால் வளர்ந்துக்கிட்டுப் போகுதே தவிர முன்னால் தலை நகரும் வழியா இல்லை. விசாரிச்சால் ஒன்பது மணிக்கு தரிசனமாம்.  அடக்ருஷ்ணா!  நமக்கில்லைன்னு  வரிசையில் இருந்து  திரும்பி  வெளியே வந்ததும்தான்,  பகவதி சந்நிதி வழியா உள்ளே ஒரு முறை போயிட்டு வந்துடலாமுன்னு  தோணுச்சு.




பகவதி சந்நிதி வழியாக உள்ளே போனோம். உள்ளே மக்கள் கூட்டம் இருக்கு.  கோவில் சந்நிதி மூடி இருக்கு.  உள்ளே  உஷத் பூஜைகள் நடத்துறாங்களாம்.
வெளியே கருவறைக்கு வெளிப்பிரகாரத்தில்  புள்ளையார், ஐயப்பன்  சந்நிதிகளைக் கும்பிட்டுக்கிட்டு வடக்கோட்டு வந்தால்  அட்டகாசமான ரெண்டு யானைகள் அலங்காரத்தோடு  தயாரா நிக்கறாங்க.  ஏழேகால் முதல் ஒன்பது மணி வரை  இன்னும் பூஜைகளும் சீவேலியும் நடக்குமாம். இப்போ மணி  ஆறேமுக்கால்தான்.  பூஜை முடிஞ்சு  சீவேலி ஆரம்பிக்க  எப்படியும் எட்டரை ஆகும். அதுவரை நமக்கு காத்திருக்க நேரம் இல்லையே:(  யானைகள் கழுத்தில் பெயர் பொறிச்ச  பதக்கங்கள்.  இதுலே ஒரு ஆள் கோபி கண்ணன்!  அதி கெம்பீரமுள்ள கொம்பனா! நம்ம கோவி கண்ணன் பெயர் நினைவுக்கு வந்தது.  பக்கத்துலே நிற்கும் மற்றவன் பெயர்  கோவிந்தன்!  அடடா....  இப்படியான்னு அதிசயம்தான்!

மேலே சுட்ட படம்: நன்றி சரிதா.  இந்த இடத்தில்தான் கோபி கண்ணனும் கோவிந்தனும் இருந்தார்கள்.
வெளியே போய்  கேசவனையாவது பார்க்கலாமுன்னு வெளியே வந்துட்டோம். கெமெராவை க்ளோக் ரூமில் இருந்து வாங்கிக்கிட்டு  தெற்கு நடைப்பக்கம் போனால்  ஸ்ரீ வல்ஸம் கெஸ்ட் ஹவுஸ் காம்பவுண்டுக்குள்ளே   கேசவன். பக்கத்துலேயே மரப்ரபு நிக்கறார்!

விஷ்ணு சகஸ்ரநாமத்தில்   இப்படி ஒரு இடத்தில் வருது பாருங்க. “அப்ரமேயோ ஹ்ருஷீகேச': பத்மநாபோ (அ)மரப்ரபு”   இந்த மரப்ரபுதான் இவர். 
இவரைப் பற்றி நம்ம வித்யா சுப்ரமண்யம் (எழுத்தாளர்)  சொல்லி இருப்பதைப் பாருங்கள்





கஜராஜன்  கேசவன் ,  1976  டிஸம்பர் 2 ஆம் தேதி (அன்றைக்கு ஏகாதசி !)  பெருமாள்கிட்டேயே போயிருச்சு. ப்ச்....






கொஞ்சம் க்ளிக்கி முடிச்சு, கெஸ்ட் ஹவுஸ் வளாகத்துலே இருக்கும் குருவாயூரப்பனை தரிசனம்  செஞ்சுட்டு மீண்டும் கொட்டகைக்கு வந்தப்ப, நம்ம சீனிவாசன் அங்கே இருந்தார். ப்ரேக் ஃபாஸ்ட் முடிச்சுக்கிட்டு வேடிக்கை பார்த்துக்கிட்டு இருந்தாராம். நம்மைப் பார்த்ததும் நான் போய் வண்டியைக் கொண்டு வரேன்னுட்டு ஓடினார்.  நமக்கு ப்ரேக்ஃபாஸ்ட் கனூஸில்தான். ஹொட்டேல் நல்லாத்தான் வசதியா இருக்கு.  இன்னும் ஒருநாள் கூடுதலாத் தங்கி இருந்துருக்கலாம்தான்......



தெற்கு நடை

ப்ரேக்ஃபாஸ்ட்க்குப்போனால்  எனக்குப் புட்டும் புழுங்கிய பழமும் வடையும் கிடைச்சது. கோபால் இட்லி வடை!  ஹொட்டேல் பில்லை செட்டில் செஞ்சுட்டு  நாங்களும் கிளம்பிட்டோம்.  பக்கத்துலே  வசூல்ராஜா இருக்காருன்னு   நேத்து  பார்த்த போர்டு  நினைவுக்கு வந்துச்சு.  அங்கே போயிட்டுப் போகலாம்.


அதுக்கு முதலில் இன்னொருக்கா கருடன்வரை போயிட்டு வரணும். வெளிச்சம் வரட்டும். திரும்பிப் போகும்போது  க்ளிக்கலாம் என்று  இருந்தவள்,  காரில்  வந்ததால்  கருடனைக் கவனிக்கலை:(  அதுக்காக.... விட்டுறமுடியுமா?


கேரளா திருப்பதி, கேரளத்திலெ திருப்பதி  திருவெங்கிடாசலபதி க்ஷேத்ரம்.(Thiruvenkidom Temple, Chiriyamkandath Nagar, Guruvayoor ) நம்ம ஹொட்டேலை அடுத்துள்ள ரயில்வேகேட் கடந்தால் இடதுபுறம் திரும்பும் சின்ன மண் ரோடில் ஒரு கிமீ மீட்டர் தூரத்தில் இருக்கு. போகும்போதே குருவாயூர் ரயில் நிலையம் கண்ணில்படாமல் போகாது!






கேரள ஸ்டைல் கோவில்தான்.  ரொம்பவே பழைய கோவிலாம்!   ராமானுஜர்  ஸ்தாபிச்ச கோவில்! ஏழுமலையான்  இங்கே  வெங்கிடாசலபதியாக கோவில்கொண்டு   மக்களுக்கு அருள் செஞ்சுக்கிட்டு வர்றார்.    கோவில் திறந்திருக்கும் நேரம் காலை நாலரை முதல்  பகல் பனிரெண்டரை.  மாலை நாலரை முதல் எட்டரை.  நல்ல பெரிய கோவிலாத்தான் இருக்கு.  புள்ளையார், சரஸ்வதி, ஐயப்பன், பகவதி சந்நிதிகளுடன் ஒரு   சர்ப்பக்காவு (ஆதிசேஷனுக்கு)   பெருமாள் இங்கே வந்து 600  வருஷங்களுக்குப் பிறகுதான்  இந்த பகவதி,  கோவில் கொண்டிருக்கிறாள்.  லேட்டா வந்தாலும் லேட்டஸ்ட்டா வந்தவளுக்குத்தான் இங்கே பயங்கர டிமாண்ட்! விஷ்ணு துர்கை!


இந்த  ஏரியாவுக்கே திருவேங்கிடம் என்ற பெயர் இருக்கு. ஆதி மூலவர் திருப்பதி கோவிலில் இருந்தே  வந்தவராம்.   பகவதி பிரதிஷ்டையான  சில காலங்களுக்குப்பின்  சில சமூக விரோதிகள்  பெருமாளின் சிலையின் தலையையும் வலது கரத்தையும் உடைச்சு சேதப்படுத்திட்டாங்க. அப்படியெ அதே நிலையில் பலகாலம்  இருந்துருக்கு.  ஆனால் கோவிலில் பகவதி வழிபாடு மட்டும் தொடர்ந்து நடந்து வந்தது.  காலப்போக்கில்   உள்ளே இருக்கும் மூலவர் சிலை யாரோடது என்பதைச் சொல்லும் ஆட்களும் இல்லாமல் போயிட்டாங்க.

பின்னே 1974 இல் தேவப்ரஸன்னம் வச்சுப் பார்த்தப்போ,    அந்த அடையாளம் இல்லாத சிலை பெருமாளோடதுன்னு தெரிய வந்தது.  திருப்பதி கோவிலுக்குத் தகவல் தெரிவிச்சு அங்கிருந்து புது சிலையைக் கொண்டுவந்து மீண்டும் பிரதிஷ்டை செஞ்சவர்  குருவாயூரப்பன் கோவில்  தந்திரி ப்ரம்மஸ்ரீ சென்னஸ் பரமேஸ்வரன் நம்பூதிரிப்பாட்.  திருமலையிலிருந்து  பெரிய ஜீயர் வந்திருந்து  அவர் முன்னிலையில்  மூலவர்  பிரதிஷ்டை ஆனதாகச் சொன்னார்கள்.



பகவதிக்கு இங்கே முட்டிரக்கல்  என்னும்  வழிபாடு  பிரபலமா இருக்கு.  வாழ்க்கையில் முக்கியமுன்னு நினைக்கும் சகல காரியங்களுக்கும்   இருவதே  ரூபாயில் இங்கே தீர்வு கிடைச்சுரும் என்ற நம்பிக்கை.
ஆரோக்யம் என்றால் தேக முட்டு,  தொழில் என்றால்  ஜோலி முட்டு, விரோதின்னா  சத்ரு முட்டு, கல்வின்னா  வித்யா முட்டு இப்படி  மங்கல்ய , சந்தான,  வியாபார, ஸ்தல, க்ருஹ, ஐஸ்வர்ய, கார்ய  சாத்ய, ஐக்கிய (எல்லாத்துக்கும் கூடவே முட்டு சேர்த்துக்குங்க) சகலமானவைகளுக்கும் பரிகாரம் இந்த முட்டிரக்கல். இதுக்குன்னே தனி டைமிங்ஸ் உண்டு.  காலை 7 முதல் 9, 10.30 முதல் 12.30, மாலை 4 முதல் 7 வரை மட்டுமே!
என்னமோ ஏதோன்னு பயந்துறாதீங்க.  இந்த வழிபாடு எப்படின்னா, பகவதி முன்னால் தேங்காய் உடைச்சு பிரார்த்தனை செய்வதுதான்.

ஆமா... இதென்ன முட்டு?   தடங்கல் என்று சொல்றோமே அதேதான். முட்டுக்கட்டை! அதை  இறக்கி விடுவது முட்டு இறக்கல். மனஸிலாயோ!!!


இன்னொரு விசேஷ வழிபாடும் நம்ம பகவதிக்கு  இங்கே உண்டு. பூ மூடல்!  பூச்சொரிதல் போல இருக்கும்போல!  தினம் ஒரு முறை மட்டும் பூமூடல் நடக்கும் என்பதால்  கட்டாயம் புக்கிங் செஞ்சுக்கணும்தான்.  இன்னும்  அஞ்சரை   வருசத்துக்குச் சான்ஸே இல்லை. 2020 வரை அட்வான்ஸ் புக்கிங் ஆயாச்சு!




வசூல்ராஜா கோவில் என்பதால்   கோவில் முன்மண்டபத்தில்  நுழைஞ்சவுடனே கண்ணில் படும்படி புக்கிங் கவுண்ட்டர்கள் எல்லாம் பக்காவா அமைச்சுருக்காங்க. வழிபாட்டு விவரங்கள் எல்லாம்  அங்கங்கே!  கேரளத்தில் மற்ற கோவில்களில் (திருநாவாய தவிர) இதுவரை இப்படிப் பார்க்கவில்லை!

பெருமாள் தரிசனம் நல்லபடியாக் கிடைச்சது. பகவதியும் அருள் செஞ்சுருப்பாள்தான்!

எப்ப குருவாயூர் போனாலும் க்ருஷ்ணனைத் தரிசிப்பதோடு சரி.  அக்கம்பக்கம் தலையைத் திருப்புவதே இல்லையாக்கும்.  எல்லாம் குதிரைக்குக் கண்பட்டை போட்டது போலத்தான்:(  இந்தமுறைதான்  வெங்கியைப் பிடிச்சேன்.  நம்ம ஹொட்டேலுக்குப் பக்கத்தில் ஒரு அரை கிமீ தூரத்தில் ஒரு பார்த்தசாரதி கோவிலிருக்காம்.  அதை மிஸ் பண்ணியது  வருத்தம்தான்.  ஆனால் நெவர் மைண்ட், நெக்ஸ்ட் டைம் என்ற எங்கள் கிவி ஆட்டிட்யூட் இருக்கே!!!

நம்ம வீட்டுலே கேசவன்.  வாசக்கதவு பிள்ளையார் கேசவனுடன் ஒரு  வெயில் வந்த நாளில்.



தொடரும்..........:-)